Guía de uso
Uso diario e resolución de problemas
Como conectar co nodo, descubrir a rede, enviar mensaxes e resolver os problemas máis habituais en Meshtastic e MeshCore. As dúas redes non funcionan exactamente igual: cando un comportamento sexa específico dunha delas, indicarémolo.
Contido actualizado o 21 de agosto de 2026.
Paso 1
Conecta co nodo
Acende o nodo, abre a aplicación correspondente e selecciona o dispositivo correcto. A primeira conexión pode tardar uns segundos.
Bluetooth
Mantén o móbil preto do nodo e revisa os permisos da aplicación. Pecha outros clientes que poidan estar conectados ao mesmo dispositivo.
Despois de actualizar Meshtastic
Se o emparellamento deixou de funcionar, elimina o nodo dos dispositivos Bluetooth gardados no móbil e volve emparellalo.
Conexión por cable ou web
Emprega un cable USB de datos e comproba que outra aplicación non teña aberto o porto serie.
Paso 2
Dálle tempo para descubrir a rede
Os contactos aparecen a medida que o nodo recibe paquetes de radio. Nunha rede tranquila poden pasar horas antes de que vexas actividade.
Meshtastic
A lista medra ao recibir información doutros nodos, como NodeInfo, posición, telemetría ou mensaxes. Tamén pode conservar nodos escoitados anteriormente, polo que aparecer na lista non significa necesariamente que ese nodo siga accesible nese momento.
MeshCore
Os contactos descóbrense mediante anuncios. Un Companion pode anunciar a súa presenza e estes anuncios poden ser locais ou propagarse polos repeaters. Por iso, un contacto pode tardar en aparecer aínda que exista cobertura entre distintas partes da rede.
Colocación
Sitúa o nodo preto dunha xanela, nunha terraza ou nun punto despexado. A altura, o relevo e os edificios condicionan o que podes escoitar.
Paso 3
Interpreta o estado das mensaxes
Mensaxes de canle en Meshtastic
Nas mensaxes de canle, a aplicación pode mostrar que outro nodo recibiu e retransmitiu o paquete. É unha pista de que a mensaxe entrou na malla, pero non confirma que todos os nodos da canle a recibisen nin, por suposto, que alguén a lese.
Mensaxes directas en Meshtastic
Nunha mensaxe directa pódese recibir unha confirmación procedente do nodo destinatario. Nese caso sabes que o paquete chegou a ese nodo. Para conseguilo ten que existir unha ruta válida pola malla e tamén un camiño de volta para a confirmación.
Mensaxes en MeshCore
MeshCore intenta entregar as mensaxes directas a través dos repeaters. Cando aínda non coñece unha ruta útil pode empregar flood para localizar o destino; unha resposta de entrega permite aprender o camiño e utilizalo nas mensaxes seguintes. Se esa ruta deixa de funcionar, o cliente pode reintentar e buscar outra.
Non interpretes todos os estados como un «lido». Unha confirmación pode indicar recepción ou entrega a nivel de rede, segundo o tipo de mensaxe e a aplicación. A ausencia de confirmación tampouco permite saber con certeza, por si soa, onde fallou o envío.
Paso 4
Comprobacións rápidas
- A aplicación non conecta
- Comproba primeiro que o nodo está acendido e que a aplicación está intentando conectar co dispositivo correcto. Achega o móbil, revisa os permisos e pecha outros clientes que poidan estar usando a mesma conexión Bluetooth, serie ou de rede.
- Non aparece ningún contacto
- Deixa o nodo acendido durante un tempo e proba desde un lugar máis despexado. Se segue sen aparecer actividade, comproba a antena, a frecuencia e que a configuración de radio coincida coa rede que queres utilizar.
- Os demais non te escoitan
- Comproba primeiro que estás na mesma rede e coa mesma configuración de radio ca os demais nodos. En Meshtastic revisa tamén a canle e a clave compartida cando corresponda; en MeshCore comproba que estás usando a configuración prevista para esa rede.
- A mensaxe queda pendente
- Comproba que a aplicación segue conectada ao nodo, que hai batería suficiente e que existe cobertura. Agarda antes de repetir o envío: a mensaxe pode necesitar varios saltos ou unha nova busca de ruta.
- O consumo aumentou
- Revisa que funcións quedaron activas: GPS, pantalla, Bluetooth, WiFi, telemetrías, anuncios e outros envíos automáticos poden aumentar o consumo. Cambia unha cousa cada vez para identificar que función está gastando máis batería.
Paso 5
Coida a rede no uso diario
No uso diario convén evitar cambios innecesarios e tráfico automático excesivo. Meshtastic e MeshCore teñen mecanismos diferentes, polo que estas son orientacións xerais; para axustes concretos consulta tamén as boas prácticas e a documentación de cada rede.
Mantén unha configuración estable
Cambia un axuste cada vez e comproba o resultado antes de modificar outro. Antes de borrar, restablecer ou reinstalar o firmware, conserva a información necesaria para recuperar a configuración que utilizas.
Reduce o tráfico automático de Meshtastic
En Meshtastic, revisa os intervalos de posición, telemetría, NodeInfo e outros envíos automáticos. Non é necesario desactivalos por sistema: axústaos ao uso do nodo e evita frecuencias innecesariamente altas, sobre todo cando hai bastante actividade na canle.
Agarda antes de repetir unha mensaxe
Cada envío pode xerar tamén retransmisións na rede. Se unha mensaxe non se confirma de inmediato, agarda antes de enviala outra vez: repetir continuamente aumenta o tráfico e non crea unha ruta que nese momento non existe.
Modera os anuncios de MeshCore
En MeshCore, os anuncios permiten descubrir nodos e manter información da rede, pero tamén ocupan radio. Nos Repeaters e Room Servers evita intervalos innecesariamente curtos e coordina coa comunidade os cambios de infraestrutura que poidan aumentar o tráfico.
Instala repeaters onde acheguen cobertura
Un nodo ben situado pode unir zonas que antes non tiñan cobertura. Antes de configurar ou instalar un router ou repeater, comproba que esa localización achega algo á rede: engadir infraestrutura onde xa non fai falta tamén pode aumentar as retransmisións.
Revisa a información que compartes
Pensa antes de publicar posición, nome, telemetría ou outros datos. En Meshtastic, unha canle compartida pode ser lida por quen dispoña da súa configuración e clave. Axusta tamén a precisión e a frecuencia da posición ao que realmente necesites compartir.
Principio práctico
Cambia unha cousa cada vez
Unha configuración estable e unhas comprobacións ordenadas facilitan atopar a causa de cada problema.